Plantun de Prouvènço

Pèr coumpara dos planto d'encò nostre

Chondrilla juncea & Zygodon rupestris

Sauto-voulame

Chondrilla juncea

Asteraceae Compositae

Àutri noum : Cantoulamo, Mauguié, Sauto-mourre, Berenchié, Lachet.

Noms en français : Chondrille à tiges de jonc, Chondrille jonciforme.

Descripcioun :
Lou sauto-voulame es uno planto coumuno d'ermas. L'estiéu se recounèis à sa cambo redo que porto quàuqui fueio e de flour jauno coumpausado e pulèu longo. L'ivèr la rouseto rèsto contro lou sòu ; li fueio soun descoupado emé de tros en arc de ciéucle que parton vers lou cèntre de la rouseto. Ramentan qu'èi talamen duro qu'empachavo li meissounié de sega lou blad : "L'ourame te lou fasié fila de coustat. Resquihavo sus la tijo" (Louis Garcin in MADON O., op.cit.).

Usanço :
Es uno bono erbo de l'ensalado champanello que fau acampa quouro li fueio de la baso soun pancaro secarouso. Se soubro la tijo de l'an davans, sara eisa de la recounèisse (fotò).

Port : Grando erbo
Taio : 0,3 à 1,2 m
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Chondrilla
Famiho : Asteraceae
Famiho classico : Compositae
Tribu : Cichorieae
Ordre : Asterales

Coulour de la flour : Jauno
Petalo : >6
Ø (o loungour) enflourejado : 1,5 cm
Flourido : Printèms - Estiéu

Sòu : Ca
Autour basso e auto : 0 à 1700 m
Aparado : Noun
Remarco : Ensalado champanello
Juliet à óutobre

Liò : Champ - Ermas - Camin
Estànci : Termoumediterran à Coulinen
Couroulougi : Éurasiatico-Cèntre-Ouèst
Ref. sc. : Chondrilla juncea L., 1753

Flouquet-dis-aubre

Zygodon rupestris

Orthotrichaceae

Nom en français : Houppe des rochers.

Descripcioun :
Aquelo mousso coumuno acroucarpo d'aperaqui 1 cm d'aut, se vèi bèn sus li pège d'aubre (pin, éuse, roure...). Li tijo soun dreissado en "C" e s'envertouion un cop seco. I'a un mouloun de rizouïde brun e papilous à la baso. Li fueio de 1,5 mm de long soun en formo de lanço emé uno costo que s'acabo en pouncho. Fai raramen d'espouroufite, pamens i'a proun de proupagulo (fotò) sus li bord di fueio.

Usanço :
Lou flouquet-dis-aubre èi lou mai coumun di Zygodon au nostre. Zygodon viridissimus s'atrovo dins li fourèst mai fredo dóu Neckeretea complanatae ; si fueio soun mai torso e si proupagulo diferènto.